نسيانووووووه

يوم الخميس الماضي كنت مع طلاب المركز طالعين رحلة لأحد الاستراحات في السلي ..
و أقاربي كانوا طالعين هم بعد لاستراحة في العفجة ( الخرج ) وكنت ناوي ألحقهم من استراحة المركز.. ( مخرج سطّعش :d )
والله استانسنا في الاستراحة وسبحنا .. وحصلت بعض المحاكمات في المسبح كما تم استرداد بعض الحقوق من بعض الأشخاص .. !
بعد المغرب حرّكنا .. ونكبوني الشباب مع ثلاثة من الطلاب أوصّلهم لبيوتهم .. والمشكلة بيوتهم منطّلة كل واحد في جهة :) بيرجعوني من مخرج سطّعش إلين مخرج ثمنية .. !
انطلقت ومعي الشباب .. الله يوسع صدورهم ..
على الطريق كنت أقرق عليهم .. " وصار كذا ويوم كذا .. ولازم كذا "
ونسأل الله الإخلاص طقيت لهم كم موعظة >> مصغّر الخط علشان الإخلاص فهمتاء ؟؟
يوم دخلت الحارة قال لي اللي جنبي
" أبو حسام .. بقول لك شي بس لاتزعل "
"سم يالأخو"
"ترا يوم تسولف عليّ تو كنت نايم وأسلّك لك ومدري وش تقول"
طلعت فوق راسي علامتين تعجب وواحد حبة عرق
"ماشاء الله أجل تعرف تسلّك حتى وأنت نايم "
ألقيت نظرة على اللي ورا .. (لقيت النوم ياكل فيهم ويعرمش)
عطيتهم صرخة ( يالله حيّهووووووووووووم ) بنبرة مرعبة >> يعاقبهم
انتفضوا المساكين :)
وصّلت أول واحد لبيته ونزل ..
اللي جنبي صحصح شوي عقب الترحيب :o
قام يسولف شوي .. ودخلنا في سواليف النسيان ومواقف النسيان ..
وأعطيه من الرخيص شوي .. >> يارب مايقرا الموضوع
واللي يعرفني زين .. تلقاه ماسكن حرّته عليّ .. من كثر ما يوصيني وأنسى ..
مشكلة عمري هي النسيان أوالفهاوة بالخرجاوي
قطعنا السالفة يوم وصلنا لبيت الطالب الثاني .. وشفنا عند جيرانهم دتسن مركّب جنوط ..
بيت هالنشبة اللي بقى معي عند جامع الدخيل ..
والعشاء قد أذن ..
واتفقنا نصلي عند أبو راشد (ياسر الدوسري)
ثم أنطله في بيته
عنننننننننننننننننن >> صوت مكينة السيارة ..
وصلنا المسجد ووقفنا ..
فتحت الباب
وفتح عبد الله الباب
صكيت الباب ووجهي أحمر
وناديته ..
"تعال اركب .. "
"ليش يبو حسام"
وأرفع ثوبي شوي ..
أثري لابسن صروال السباحة
وفنيلة البدلة تحت الثوب .. !!
حمّر وجهي ..
وعبد الله قام يشرق من الضحك
وكان الموقف هذا أكبر دليل على فهاوتي ونسياني ..
قلت له بنصلي في أي مسجد ثاني ..
حطّيت على الـ R
دقيت ريوس
و ..
طع
!
ناظرت ورا
مالقيت شي
نزلت ..
أثري صادمن لي دباب توصيل حق بقالة :)
ههههههه
أشوى .. السواق أبو يمن ماجاه شي
كذلك الدباب
والسيارة أيضا
أما عبد الله قام يرافس من الضحك
بعد ذلك
صلينا بخشوع .. بالملابس الجذابة ..
في أحد مساجد الرياض



وباقي اليوم مافيه موقف يذكر ..
غير أن الثوب ضايقني وأنا أسوق على طريق الخرج
وفصخته وأنا أسوق >> يامجرم .. :z ..


أوه صح نسيت أقول لكم . ..
يوم وصلت لاستراحة أقاربي لقيت براطمهم متنفخة ..
استغربت ..
ثم ضحكت ..
يوم دريت أنهم كانوا يلعبون كورة .. وجابو العيد بخلية نحل ... والنحل لحقهم إلى الخيمة .. وطق مساميره عليهم .. :O

..

عبد الله وباقي الشباب إن شاء الله ماأكون زعلتكم ولا شي :) .. ترا المقصد مجرد الفكاهة ..