ثلاثة حظوظ ..... ... ... بقسيمة !!

أمس كنت متواعد مع واحد ساكن في الشمال على قولته .. و كنت جايع (كعادتي :) ) .. فقلت أروح أشتري غداء من محل على طريق الملك عبد الله .. (دايت سنتر)

وعادتي إني أجيه من الحارة اللي ورا ..

يوم وصلت قلت أبعكس وأوقف قدام المحل ..

وأنا عاكس ..

جت من قدامي دورية داخله من طريق الملك عبد الله إلى الطريق اللي كنت عليه ..

وتقابلنا وجه بوجه :p .. ياسلام ..

على طول وقفت وقوف تام ونزلت ( حركات اللي مايقدر يصرف :y ) .. وجلست أنتظر شوي ..

أثر المرور ما درى عني الظاهر ( أو أنه رحمني !) ..
..
أشوى :f ..

طلبت ورحت ..

ويوم استلمت الدائري الشمالي طال عمرك صفقت يسار و كعّيت أم البنزين (وررررررررررر) ..

شوي وأشوف واحد يكبس وراي .. >> ياحبيبي :o

ويوم ناظرت شفت كورولا خضراء بصدامات سوداء يكبس ويلزق فيني .. :D ..

مسكت المسار الأوسط .. وجلست أجهز كم تصريفة ..

إلا ويسبقني المرور السري ويوقف اللي قدامي :D .. >> والله شكلي مولود بالحظ :D

مشيت وأنا أضحك على نفسي . لأنها مهيب أول مرة تصير معي ..

دقيت على خوينا ( عبد العزيز ) وأخذت منه وصف البيت

قال اطلع على طريق القصيم وامش إلين تجيك عشر محطات على اليمين .. ثم اطلع مع المخرج اللي عقب ..

قعدت اضحك عليه .. " ياحليلك"

ناظر فيني كذا >>> اصررررررررف

قال " يبن الحلال أكذب عليك أنا؟ "

قلت " يالله نشوف "

ومشيت إلين جاني التفتيش .. >> صراحة كنت متعدي الميه وعشرين :D

استغربت يوم مشاني صراحة ..

ثلاث حظوظ في يوم واحد .. لا.. في ساعة وحدة .. عمرها ماصارات معي .. :d

أففففف ... استانست لأبعد الحدود ورفعت صوت المسجل ..
..
نبتت لي عشر محطات على اليمين زي ماقال عبد العزيز .. وطلعت بعدها مع المخرج.. واللي يعرف المخرج هذا .. حق القوات الخاصة ..وتفتيش مدري وشلون قايل ..

أنا ما أحب الحركات هذي .. بريء ..

دقيت على عزوز وقال "أنت ماشي صح"
..

المهم .. وعن الخراط والفلسفة ...

وأنا راجع .. حرصت إني أمشي 120 ولا أزيد عليها .. >> خلاص صار فاهم ؛)

شفت القفّاط ( الدورية اللي تندس عالجنب وتثبت الرادار و((تقفّط)) )

ناظرت في العداد .. لقيته قبل المية وعشرين بشعره .. ( يعني 118 أو 117 ..

يوم وصلت التفتيش تكلم القفاط الله ياخذه " فورد قديم "

قال لي الشرطي "الرخصة والاستمارة ... .... وقف وقف بس" ..

،،

وقفني أبو الشباب .. وجلس يكتب قسيمة .. سألته " كم سجلتوا علي ؟؟ "قال " 167 كيلو ":o

وين يبو متأكد؟!

"الرادار مسجلها عليك"

طيب ممكن تشوف عداد السيارة؟!!!

,,,

طبعاً اللي يعرفني ويعرف سيارتي .. السيارة قديمة ..

شوفوا آخر الطبلون

يعني بالله وين مية وسبعة وستين معه ؟؟

قلت يبن الحلال .. عداد السيارة مية واربعين

"أقول الرادار مسجلها عليك"

طيب السيارة والله ماتمشي هالسرعة

"لأن عندك بالميل" >>>> الظاهر ان الأخ هو صاحب السيارة موب أنا :@

..
>> بيني وبينكم بغيت أقول له " ليش مامسكتوني تو مرتين تجاوز سرعة ومرة عكس سير " عشان ينصّرني ( يودّيني للناصرية ) :D
..

الشاهد إني خذت القسيمة .. وقلت "الله يسامحكم بس"ورجعت وأنا ما أدري أضحك أو أزعل أو أطق راسي بالجدار ..

ويعلم الله مابقت ذرّة بنزين في المكينة إلا انطحنت طحن من قوة الدعس .. ( من القهر ) .. ولا أحد وقّفني .. >> تكفون امسكوني :#
هذي القسيمة بلونها الكئيب .. والكتابة يالله تقراها .. حتى الكربون باخلين فيه :@

وهذي المزيونة وقد سبق عرض مفاتنها من قبل

ختاماً .. يقولون من قديم "في الشدائد يعرف الإخوان"

ويقول أحدهم"خير المال ما وَجَّهْتَهُ وِجْهتَه"

رسوم المخالفة 600 ريال

نبغى تطبيق عملي

:p

..